Salla e gjyqit në Vancouver ishte e mbushur me reporterë ndërkombëtarë dhe vendas në ditën e parë të gjyqit që pritet të zgjasë 8 ditë lidhur me zbardhjen e rastit të Wanzhou

Drejtoresha e çështjeve financiare (CFO) e kompanisë teknologjike kineze Huawei, Meng Wanzhou doli para gjykatës në Vancouver të Kanadasë.

Salla e gjyqit në Vancouver ishte e mbushur me reporterë ndërkombëtarë dhe vendas në ditën e parë të gjyqit që pritet të zgjasë 8 ditë lidhur me zbardhjen e rastit të Wanzhou.

Ajo është duke luftuar me kërkesën e SHBA-ve për ekstradim nga autoritetet kanadeze, të cilat e kërkojnë në bazë të akuzave për mashtrim, obstruksion dhe komplot, në lidhje me shkeljen e sanksioneve amerikane ndaj Iranit.

Ekipi i saj i avokatëve shpreson të dëshmojë se Agjencia e Shërbimeve Kufitare të Kanadasë (CBSA) e mbajti Wanzhou në paraburgim për tre orë para arrestimit të saj nga Policia Mbretërore Kanadeze (RCMP). Këto tre orë u përdorën për të kryer një “hetim të fshehtë kriminal” të nxitur nga Byroja Federale e Hetimeve të SHBA-së (FBI) që çoi në arrestimin e saj në dhjetor në aeroportin e Vancouverit.

Por, zyra e prokurorit të përgjithshëm tha se Wanzhou u trajtua si të gjithë personat tjetër që përpiqen të hyjnë në Kanada me urdhër arresti kundër saj.

“Nuk ishte komplot. Plani i vetëm i CBSA-së ishte të kryejë detyrimet e saj ligjore dhe asgjë më shumë”, tha Zyra e prokurorit.

Wanzhou ka qenë nën arrest shtëpiak që nga dhjetori ndërsa procedurat e sotme u përqendruan kryesisht në ekipin e saj të avokatëve të cilët kërkuan më shumë dokumente nga Zyra e prokurorit të përgjithshëm në përpjekje për të treguar përplasje midis autoriteteve kanadeze dhe amerikane dhe se arrestimi ishte i pavend.

Seanca dëgjimore e saj për ekstradim do të fillojë në janar të vitit 2020, por ekipi i saj mbrojtës dëshiron që përmes dokumenteve shtesë të përpiqet të argumentojë se arrestimi ishte një shkelje e procesit.

Më 16 shtator, Zyra e prokurorit të përgjithshëm tha se avokatët e Wanzhou tashmë kishin marrë dokumentacionin e mjaftueshëm.

Megjithatë “ajo nuk ka arritur t’u japë një shpjegim pretendimeve nëse sjellja e CBSA ose RCMP ishte abuzive apo se SHBA-të janë sjellë në mënyrë të padrejtë”, tha ajo.

Arrestimi i saj përfundoi në një përpleasje diplomatike me Kinën, ku zyrtarët e zemëruar bënë thirrje për lirimin e saj të menjëhershëm.

Që nga arrestimi i saj, zyrtarët kinezë kanë paditur dy kanadezë për spiunazh dhe refuzimin për të importuar produkte bujqësore dhe të mishit nga Kanadaja në Kinë./AA